قصور وطرقات جبل نفوسة

أسّ نـ سّبت: أد اوينت تسدنان ئسان نـ زومر ئه، أد گون غف ـسن دسكو نـ أشرشي،(1) ئن تعزبين أد كمون غف ـسن لعرسان دي تدارت نـ تسليوت، أتـ تشون، د أد قّيمون أد ؤرارن، مامّو يرنا ويدي سـ ئخواي، د أنگّز، د تعالوليا.

سـ ئس، أد فّغن ئن لغابت، أد مژونن أف سن، واسي غر ـسن دي ؤفس نّس لحنّي يقيم د لعرسان، واسي ول غر ـس، أد اسون أف ئديس أد قّيمون أتـ مزيين ئن ديط، أد ؤگورن، أد سمنسين ئن باب نـ ئسلان، سـ ئس أد ؤقان ؤفس د سن نـ ؤسّان، تّتون سي لعرسان، ديس يوقا ئسلان.

أل مّي أد ياس بوشيل يغسّ تنجيفت، أيـ سرس أف تبوشيلت، أ تيوط تاوطن ئمان نّسن، سي ئمان نّسن د ئباب نّسن فكّون، [د] تّاغون أيتلي.

أل مّي أد روان أيتلي أتـ رولن تبوشيلت ديد نـ بوشيل د أتـ كمون يودان ئصبيحن د أتـ قضا تغوسا.

لفصل دي ممّو يزدغ دي درار نـ ئنفوسن

(ص47) نيتن أف سن: سـ ئسن واسي مازيغ، د سـ ئسن واسي يوس ـد سـ أمكان وايط، واسي مازيغ سي لباگول ئن لالوت، مّالون ـاسن ئن تيرو ئمازيغن، دد نيتن يودان هدان ئمول، سوسمن أل مّي أيصار ماسالا، أتـ قّيمون ئن دفّر، واسي يوس ـد سـ أمكان وايط، أت فسّاطو، د أت ئفران، ئمزوارن نّسن، د أت موستاوا مّنغن نيتن د أت غوزا رنانتن، أت غوزا ؤسون ـد ﴿سـ﴾ [د] أتن سفّغن سي ئغاسرا نّسن، ؤسون ـد ئباب نـ لغرب ؤگّاتون ديدسن، ييسي أگار اسن ئمزيان مقّورت، دي أمكان مّالون ـاس تيغدوا، أ گار أمّي عامر د ؤرسطّيف، متن ديس أت غوزيا.

ساسيه، يودد بريد نّغ دي ئفران، نّطن سي مسوا، ئن ئباضيا.

ئفران زگني نّسن أت سلاما، دد نتنين ئصار غف ـسن أوال ؤه، دد زگني أت ؤرسطّيف، ﴿ؤسون ـد﴾ د ئترارن،د} أت فسّاطو، ؤسون ـد سي لغرب.

أت عمر، د أت سلطان، يودان وعرن ئمول نيتن سـ أدّو أت ئفران. ماغر ئفران نيت تأمقرانت نـ درار، يودان نّس ئغفاون نّسن قّورن.