قصور وطرقات جبل نفوسة

سيولن ئن باب نـ غاسرو، أد تشون ئن تغفر توفوت، أد سيولن ئشمجان أد سدبدن، أد جرون غف ـسن ئبوشيلن نـ غاسرو ماني لاّن، أد گون أوزير ؤدجون، د أسـ فكون أقطّوم، دي ؤفس نّس، سي تيرو أ يقّيم يتستش دي لعرسان، دد نيتن ؤل أتن يژار أمخلوق.

ئن أسّ نـ لتنين: ديس تفّغنت تيعزّبين، د تسيلوت، د ألمّاس نّسنت ئن تانوت، أد سيردنت ديس ئقبّاش أن زگني نـ أسّ، أتن توطن يودان سـ تغالّين، د ئشمجان ئن دوس، د أد اوين ـت سـ ؤرار، د لميز، مقّر ؤل أتـ اف ـد ماني أتـ ؤدد، سي يودان، أن أتـ سيتفن ئن تادّارات نـ ئباب نّس، (ص45) ئن ديط أسـ گون لحني، نيتت د تعزبين تّاسون ئن ئباب نـ ئزلي، سي منسي ئن أفلاّح، دد نيتن مّالون. أيوه ئط نـ تّلات ئن ئط نـ لگمت.

أسّ نـ لگمت: سي ألاي نـ توفوت، ئن تيژارنين دد نيتن تستشون د أرواي د ئسان، ئمازيغن، د ئبياتن، ئملالن، د ئژطّافن، ئن توقزين، أد اوين ألغم، أد گون غف ـس تدربوكت، تسروطن ـت صبيح، أد سكمون ديس تسيلوت، دد بوشيل مشّك، د تژيوا نـ أرواي، أد سكرمن ألغم ئه د أد اسون ئباب نـ ؤرار، [د] ئمناين، د ئرگازن، د أد اوين تسيلوت ئن أرگاز نّس، أد اوطن ئغفار نـ توفوت، د أد سكمون تسيلوت، د أرگاز نّس دي گاجي نّسن، أد كمون ديدسن لعرسان، د تيّا، أد تشون أرواي سـ ئس تفّغن ئن ئمي نـ گاجي، أد ؤددن سـ تبندقين نّسن، أن أ يقضا أرگاز تغوسا سـ تسيلوت، ؤوتن أييه لبارود، أد سلون يودان ملون: "يوه نـ يلّيس نـ ويدي تفّغ ـد د تعيزّبت". تيرو أد غرسن زومر ئبوشيلن ييه د أد كّسن ؤگليم نّس د توسا نّس أتـ گون دي تفاوت أتـ تشون، فّغن ﴿ئن﴾ [سي] غر ـسن. (ص46) يقّيم نيت د تسليوت نّس ئن أفلاح، أد ياس أوزير نّس أتـ يسوفّغ ديط، ووه ئط نـ سّبت.