قصور وطرقات جبل نفوسة

أل مّي تغسّد درار نـ ئنفوسن، فّغ سي طرابلس، [د] أغ بريد نـ حمّامجي. أگار ـاس د تمدينت روبّو نـ سّاعت. سـ يوس أغ بريد نـ گرگارش أل مّي أتـ اس ـد ئن ژنژور، أگار ـاس د ﴿طرابلـ﴾ طرابلس زگني نـ أسّ.

سـ يوس يمژون بريد أف سن، ؤدجون يتاس ـد أف ئفران، دد وايط يتاس ـد أف بوط نـ تيط. دد مسسرون؛ د أمكان مّالون ـاس المّاس نـ جيدي أملاّل، ديس دوس تاسبّالت.

[أ]تـ ؤگورد [د] بريد أن د يوقا جيدي أملال، ديس دوس تانوت تترارت. سـ يوس أتـ اس ـد ئن ترينا أيـ وقا أسّ. فّغ سـ يوس غبشّا أغ أبريد أل مّي أتـ اس ـد ئن جمّال تمورت نـ ؤرشفانين. ؤگور سـ يوس أتـ اس ـد ئن تمعمورت.

سـ أدّو ـس تانوت نـ بلگمودي. أگار ـاس د ترينا زگني نـ أسّ، سـ يوس أتـ اس ـد ئن أمكان مّالون ـاس سّايخت، ديس تزگرين ئمول.

د رني د بريد أتـ اف ـد گطّيس تمورت (ص2) نـ تيرزا، أ يوقا أسّ ويدي.

ؤگور د جتشا أتـ اس ـد ئن بوط نـ درار ديس تيط نـ أمن مّالون ـاس تيط نـ تجارف أگار اسن ﴿نـ﴾ أدرار مقّورت.

ألي [أ]ن مصعد أتـ ؤگورد أشّار أتـ اس ـد ئن الاّغ نـ لخمّاسيا، دد نيت توعر، ئمول تگّورد د ﴿ت﴾ تنّط أن د توقا. يلاّ دوس غاسرو نـ يودان ئمزوارن، مّالون ـاس ماجر.

سـ يوس أتـ اس ـد ئن تندونا ديس تيمطشين د تزمّورين نـ أرا [نـ] عمور د سّات ـس تانوت نـ هلال د ألاّغ نـ ؤسف [نـ] ومنار دوس أتـ كمد لموديريت نـ ئفران.

لباب دي لموديريت نـ ئفران

ألي د ؤسف نـ ومنار أل مّي أتـ اس ـد ئن غاسرو [نـ] ؤغارم، نيت ئباضيا، يلاّ أف ويدر نـ ؤسف سـ لقبلت، دد ويدر أبحري ديس تيط نـ أمن، مّالون ـاس تافطشنا. ديس أ ييگ(1) ؤكژ نـ تميضيوين د تزداي ديس تژّان ئغماين يرخا.