قصور وطرقات جبل نفوسة

دنّگ ـاس غاسرو نـ لقلعت مقر ئمول ديس أ ييگ ؤفس د ؤ[د]جون نـ تميضيوين نـ تيدّار، [د] ديس شارت نـ تمزگيديوين، ؤدجوت مّالون ـاس تادويت، تيدي تمزگيدا نـ لحومت، د تيدي تمزگيدا نـ أرنون، غاسرو ووه الاّغ نـ درار ئن ئغف نّس دد نيت ئباضيا.

تلاّ ديس تالا مّالون ـاس نانّا (ص3) تالا نـ لقلعت، تاوين ـاس ئبوشيلن ئمشكانن أل مّي ؤطنن أتـ سيردن ديسن د أمن، د طلقن اسن طّلوق، يتفرج ربي غف ـسن.

غر ـسن تيقسبت مّالون ـاس تيقسبت نـ عوكّا، تنّي أف غاسرو أمقران، سـ لقبلت ديس أ ييگ تميضي نـ تيدّار.

غرديس ـس تيقسبت تيدي سـ لغرب نـ أت بوخزاما. قبلي اسنت تيقسبت نـ سوفّيط سي يودان ئمزوارن ينط سـ ئس تيلاتين نـ تمداي د تژورين(1) ؤل يتقود ؤدجون أتـ يويهت(2).

دي ؤل نّس، غربي نـ لقلعت غاسرو وايط مّالون ـاس ؤم جّورسان أگار اسن تگوريا نـ زگني نـ سّاعت دد نيت د ئمي نـ تدزيرت تلاّ أف ئغف نـ درار ينّط سـ ئس أزمّور د تمداي، ديس تمزگيدا دي أغلد، ديس ؤفس نـ تيدّار نـ ئعزابن ئباضيا، دد ييدي ئمالكيين أد گون سنت نـ تمضيوين د زگني نـ تيدّار.

غرديس ـس تيقسبت نـ يحيى نيت ئمالكيين، [مـ]بحّر غاسرو أمقران ددنيت أف ئغف نـ درار،

سـ أدّو ـاس ؤسف نـ شيلوا يطشار سـ أزمّور، ينغّل أمن نّس دنّگ لقطّار.

ئكم سـ يوس ئن ألمّاس نـ تدزيرت د بريد نـ دراع، أل مّي أتاس ـد ئن غاسرو نـ أت زورايت أف ئغف نـ تحفافت، ينط سـ ئس أزمّور (ص4) قبلي ـاس تلات نـ تانوت، ديس تانوت نـ أمن، دد نيت تمژون أف سنت، أگار اسنت تانوت مّالون ـاس ميطر، د تمزگيدا مّالون ـاس تاحواريت، نّطن سـ ئس ئزكوان، بحري ـاس تمزگيدا مّالون ـاس تمزگيدا نـ تيعيزبت، د أتـ ئگ تميضي نـ تيدّار، ئباضيا.