قصور وطرقات جبل نفوسة

أغ سـ يوس مبحر، د بريد أتـ اس ـد ئن تنيت، تّاويد يودان سي طرابلس بريد نـ سلطان، د ألاّغ نـ تنيت ئن بحرا أشّار ديس سنت نـ تينا، مّالون اسنت تينا نـ تاغما د ألاّغ نـ تحفافت.

غرديس اسنت تيقسبت تمزوارت ألي سـ يوس د[ي] تنيت أتـ اس ـد ئن تاغما، د نيت سن نـ ئغاسرا أگار اسن لميل تشرقيت مّالون ـاس يحيا، ئباضيا، ديس تمزگيدا، أتـ ئگ ؤير نـ تيدّار، تلاّ أف ئغف نـ تحفافت.

سـ شرق درار، لغرب أزمّور، د تغربيت مّالون ـاس تاغما، ديس أد گون سن نـ ئفاسّن نـ تيدّار ئعرابن، مّالون اسن شوياب، أتـ ئگ تميضي د زگني نـ تيدّار ئباضيا، ديس تمزگيدا نـ حواريين، شرقي غاسرو دد نيت د ألماس نـ زّملت تلاّ د ئغف نـ تحفافت، ديس ئساغّن رخان نـ أمن نـ أنژر، د تينا نّسن بعدنت ئمول لاّنت دي بوط نـ درار.

دي لخشايش (ص5) سنت، نملتنت سـ شرق، د ؤدجوت سـ لغرب، مّالون ـاس لكليبا.

تلاّ دي زّملت ؤه تدزيرت، أيـ اتف أرگاز ديس ؤل يتاگّد ممّو يغسّت، [أل مّي] أد اسون يودان نـ دّونيت، دد نيت أژرو ؤدجون ئمي نّس سـ شرق، كّامون سـ ئس، د أژرو نّس أ ييگ تميضي نـ ئغالن، ديس سـ لغرب تميدال، د ألمّاس نـ أژرو مقّورت ئمول، غزون تنت يودان ئمزوارن.

ؤگور غربي نـ أت زورايت د تاغما، أتـ اس ـد ئن أت ؤغاسرو يوسد أف وكريم نـ درار، نّطنت سـ ئس تينا رخانت، سن نـ ئفاسّن د أزمّور، ينّط سـ ئس دي غاسرو تمزگيدا، لاّن ديس ؤداين، سين ئفاسّن د سنت نـ تيدّار. ئمازيغن، زگني نـ تميضي نـ تيدّار.