قصور وطرقات جبل نفوسة

دنّگ ـاس سـ شرق غاسرو نـ تگربوست، ئباضيا، غر ـسن ئساغّن ئمول، ديس تمزگيدا، د ألمّاس نـ غاسرو تلاّ أف ئغف نـ تحفافت، د ألمّاس نّس تلات تهوگا ئن تيطّ نـ أمن، د تيط ووه(1) أتـ تطشارون سـ ئس تّورك، د يودان نـ تگربوست، ديس أ ييگ ؤفس نـ تميضيوين د تزداي، أد گون ديس ژاليم، د فلفل أورّاغ، تيرو توقا تادزيرت نـ ئفران.

لفصل دي تمورت نـ لغزاز

أنـ ادل تيرو سـ ؤسف نـ تيغوزا، مّالون اسن ئبياتن وادي لغزاز. ديس (ص9) ؤفس نـ تيقسبين، يوسد سـ أدّو تحفافت تّنط سـ ئس سي كول مكان، ديس ئمي سـ مبحر يتاوي ئن جّفارت، دد نيتن ئماليكين.

تيقسبت تمادّايت مّالون ـاس لمساعيد تلاّ د ئغف نـ درار ديس تمزگيدا مشّكيت دنّگ ـاس تيقسبت نـ أت عطيا.

تحادات سـ شّرق تيقسبت نـ أت خليفا، سـ أدّو أژرو دنّگ ـاس لگطّار، تمورت نـ تژورين د تزمّورين د تمداي ئمول، ينغل ديس أمن نـ تروميت.

سـ لغرب نـ لگطّار تيقسبت نـ بو خطام يوقا دوس ؤسف نـ تغوزيا.

لفصل دي تمورت نـ تروميت

أنـ الي تيرو ئن تروميت، ديس ؤفس نـ ئغاسرا مقّورت، دد نيتن ئمالكيين، دنّگ تحفافت أگار اسن ؤسف نـ أمن يطشار سي ئغماين.

غاسرو بحري أت سهل يلاّ د ئغف نـ درار، سّات ـس أت يحيا أف ويدر نـ ؤسف ﴿نـ﴾ أمن يتازّال، قبلي ـاس أت جلاّل، ئباب نّس زگني د ئشمجان، دد زگني ئملاّلن، تمورت نـ تمديت د تيزديت(2)، تلاّ شرق نـ ؤسف.

غاسرو وايط مّالون ـاس لقطع، يلاّ سـ أدّو درار، غربي نـ ؤسف (ص10) دنّگ اسنت غاسرو نـ أت بو عوافي يلاّ د ئغف نـ درار شرقي نـ ؤسف دنّگ ـاس تيطّ نـ ؤسف تمقرانت تتـ سسو ؤسف، د أمن نّس هوگّان ئن لگطّار يوقا(3) دوس تروميت.

لفصل دي تمورت نـ لخلايفا