قصور وطرقات جبل نفوسة

تيرو أنـ غرّب ئن لخلايفا أنـ ادل سي غاسرو نـ ژّورگان يلاّ د ألمّاس نـ لغابت نـ أزمّور د تمطشين أف ؤيدر نـ تلات سّات ـس سنت نـ تينا سّاوون سـ ئسنت، بعدنت أف غاسرو، أگار ژّورگان د تروميت تاگوريا نـ سّاعت.

دفّر ـاسن غاسرو نـ لبراهما يلاّ أف ئغف نـ تحفافت سـ مبحّر نـ ژّورگان غر ـسن أزمّور يرخا د تمطشين رخانت، د تموراوين تيدي لاّنت دي ؤسف، ديس أمن نـ تيطّاوين رخان، تگون ديس ئغماين ئمول.

أت ذياب د أت عطيا لاّن أف ويدر نـ ؤسف سـ شّرق د أت لواد سـ لغرب، ئغاسرا يوه ؤسون ـد دي زّملت، دنّگ ؤسف تينا رخانت أد گونت ؤكّوژ نـ ئفسن مّالون اسنت تعوينات، تيدي نـ تانوت تيدي نـ ئرگازن(1)، تسسون ديسنت ئبياتن رخان تلغمين د تاتّن د تغاطّين.

دي نودو هوگّان غف سنت غاسرو (ص11) وايط يبعد غف ـسن تاگوريا نـ زگني نـ سّاعت مّالون ـاس أت صغير يلاّ أف ئغف نـ تحفافت نـ زّملت.

سي لغرب سـ أدّو ـاس ؤسف نـ لباگول ئدغرق ئمول ديس دي توكريمت نّس تيطّ نـ أمن حلاون ئمول.

أس ـد سـ يوس ئن زاويت نـ لعالم، تلاّ د ألمّاس نـ طّاهر أگار لخلايفا د رّياينا د ألمّاس، أگار اسن تگوريا نـ سنت نـ سّاعات.

لفصل دي تمورت نـ رّياينا

أنـ ئكم تيرو [ئن] رّياينا دد نيتن ئمالكيين، أنـ ادل سي شّرق، غاسرو أمزوار مّالون ـاس أت ؤ علي يلاّ أف ئغف نـ تحفافت ديس تمزگيدا نـ ئبياتن، د ألاّغ نـ تحفافت تيطّ نـ أمن، ديس تزداي ﴿ي﴾ دروسن[ت] سّاوون سـ ئس أت ؤ علي د غر ـسن ئساغّن رخان.

دفّر غاسرو تيقسبت نـ لغورابا ينّط سـ ئس أزمّور.

سـ يوس غرّب أتـ اس ـد ئن أت بوحسين غاسرو مقّر ئمول ديس سنت نـ تمزگيديوين أگار اسن د أت ؤ علي تگوريا نـ سّاعت تلاّ أف ئغف نـ تحفافت دي بوط نّس تيط نـ أمن مقّريت ئمول ديس تزداي رخانت.

غرديس ـس غاسرو وايط (ص12) مقّر مّالون ـاس أت لعين، ديس