قصور وطرقات جبل نفوسة

أ ييگ ؤفس نـ تميضيوين نـ تيدّار، يوسد د ألاّغ نـ تحفافت تّنط سـ ئس تحفافت سي كل مكان.

دي ئغف نـ تحفافت سـ لغرب غاسرو نـ أت عبد لعزيز، ديس تمزگيدا سّات ـس ئساغّن نـ أمن نـ أنژر، أل مّي أد ؤقان تاوين ـد أمن سي لعين.

دي بوط نـ تحفافت غربي نـ أت عبد لعزيز زّملت مقّريت ئمول، ديس شارت نـ ئغاسرا، د ديس زّاويت نـ سّنوسي.

غاسرو ؤدجون مّالون ـاس لفواضل، أگار ـاس د أت عبد لعزيز تگوريا نـ زگني نـ سّاعت، دد نيت يلاّ د ألمّاس نـ زّملت ينّط سـ ئس أزمّور.

دد وايط مّالون ـاس لعگبي، يلاّ أف ئغف نـ أژرو، ديس تمزگيدا، سـ أدّو ـاس تيط نـ أمن مقّريت ديس تزداي ئمول، سّاوون سـ ئس يودان نـ غاسرو.

سّات ـس غاسرو نـ أت ريّان، يلاّ أف ئغف نـ درار، سـ [أ]دّو غاسرو تيطّ نـ أمن مقّريت، ديس تزداي ئمول، نيت تانگّاروت ﴿نـ﴾ دي لموديريت نـ ئفران.

سـ لغرب أت ريّان غر ـسن أخريب سّات ـسن مّالون ـاس أخريب نـ أشمّاخ أمزوار نـ باب نـ [و]اوال، سـ يوس تيرو ؤل ديس يودان، دد يمژّا تمطشين، أ ييگ تميضي نـ تيلاتن نـ تمداي (ص13) .

لباب دي لموديريت نـ فسّاطو

لفصل دي تمورت نـ زّنتان

أنـ ادل تيرو دي لموديريت نـ فسّاطو.

أمزوارو نّس سـ شّرق زّنتان، دد نيت توسد دي طّاهر، أف زّملت نّس أخريب نـ تغرمين، دد نيت ئمالكيين، ديس ؤكّوژ نـ ئغاسرا مقّورت، ؤگون ؤير نـ تميضيوين ئترّاسن، سـ ئس أشّار لاّن دي لوعسا، دد سـ ئسن مامّو يلاّ دي غاسرو.

أمزوار نّسن مّالون ـاس أت دويب، يلاّ د ألمّاس نـ تلات نـ أزمّور ينّط سـ ئس.

د ديسن أشّار نـ تيدّار، غزونت تغازا سـ ادّو تامورت، أد غزون ؤكّژ نـ ئفاسّن نـ ئغالّن سـ [و]ودم نـ تمورت ئن ألاّغ نّس، دد تاكمون سـ أدّو تمورت تزقوين د ئرجانن، دد ؤگون دنّگ تزقوين تميدال. ئمي نـ تدّارت أسـ گون(1) أدريوين، أل مّي أد سوفغن ئمي نـ تدّارت د أمكان وايط.