قصور وطرقات جبل نفوسة

د ديس أشّار نـ تيدّار ئسطشو(1) سي ئمشم، دد نيتن كسّبن أزمّور د تلغمين د تاتّن، ؤل غر ـسن ـش أمن نـ تيطّاوين د تينا، سّاوون أمن نـ أنژر غر ـسن ئساغّن ئمول.

سـ دفّر ـاسن غاسرو نـ أت خليفا، مشّك يلاّ دي ئغف (ص14) نـ [و] درار، يودان نّسن تعزّبن ئن لوعسا.

سّات أت خليفا أت بلهول، تيدّار نّسن غزونت تغازا، ديس أد گون ؤفس د سن نـ تميضيوين نـ تيدّار.

غاسرو قبلي مّالون ـاس لگواسم، زگني نـ تيدّار تسطشي، دد زگني تغازا، ديسن زّاويت نـ سّنوسي، ئغار ديس لحاج بلقاسم أجريو، باب نـ تالغمت ترخا(2) يوقا دوس زّنتان.

لفصل دي تمورت نـ رّوجبان

أد ناس سـ يوس ئن رّوجبان، أگار ـاس د زّنتان ؤسف مقّور ئمول مّالون ـاس متلالا، د مّالون ـاس وادي لاخيرا.

دي بوط نّس ئن أدّاي دي جّفارت غاسرو [نـ] أت لحاج، تسّكرامن ديس ئبياتن تمدّورت، ؤل تقّيمون ـش ديس، يلاّ دوس نيلتي نّس سـ أدّو ـس سـ مبحّر تيطّ نـ أمن مقّوريت، د تزداي يرخا(3)، د ئباب نّس ئباب نـ ئبرگان، خوگان ﴿و﴾ [د] تسهوان دي تمورا دي ئغف نـ ؤسف ووه ئن نّج.

د ألاّغ [نـ و]ژرو تيط نـ أمن سّاوون سـ ئس، ديس تالا نـ أمن أتـ سسون ديس تيلغمين د تاتّن.

أنـ ألي تيرو ئن رّوجبان، أنـ ادل سـ تيقسبت نـ أت براهيم، تلاّ د ألمّاس نـ أژرو، ديس تيط نـ أمن سّات تيقسبت مقّريت ئمول، ديس تزداي (ص15) د تمداي د تژورين، تگّون ديس ئغماين، د يودان نّس [د] ئمقرتن، أد گون زگني نـ تميضي نـ تيدّار.

أتـ اليد سـ يوس ئن [مـ]بحر، أتـ اس ـد ئن تيركت مّالون ـاس أت عطيا، ديس زّاويت نـ سّنوسي، عزّمن ديس ئبيّاتن، دد نيت د ألمّاس نـ تلات أ تيگ تميضي نـ تيدّار، تلاّ أف ئغف نـ تحفافت.