قصور وطرقات جبل نفوسة

سـ لغرب نـ غاسرو أزمّور يرخا د أخريب د [أ]كبوري،(1) ديس درار. دي ئغف نـ درار تاطلالت، مّالون ـاس تاطلالت نـ فريعيس.

بحري نـ أت عطيا، غاسرو مّالون ـاس شارن، يلاّ أف ئغف نـ تحفافت، غرس أزمّور يرخا. د تاتّن نّس ئمول، ديس تمزگيدا.

غربي نـ غاسرو أخريب مقّور، مّالون ـاس ئدرف، ديس تمزگيدا نـ ئمزوارن موقّوريت ئمول.

د ألماس نـ لغابت، بحري نـ أخريب غاسرو وايط، مّالون ـاس زعفرانا، يلاّ أف ئغف نـ أژرو، ديس أشّار نـ تيدّار [د] ئمازيغن، د أشّار د ئبياتن، ديس تمزگيدا نـ ئباضيا، د تيطّ د ألاّغ نـ أژرو، سّاوون سـ ئس، دد غر ـسن ئساغّن ئمول، أزمّور نّسن يودد سـ لغرب نـ غاسرو.

سـ يوس أتـ اس ـد ئن غاسرو نـ لغولث، يلاّ د ألمّاس نـ لغابت، ينّط سـ ئس أزمّور، ديس تمزگيدا نـ ئباضيا تقديمت، أمن نّس لاّن د ألمّاس نـ ؤسف، (ص16) تيط مشّكيت تبعد غف ـسن، توعر ئمول.

رني سـ يوس شرقي نـ غاسرو، أتـ اس ـد ئن غاسرو نـ زنتوت، يلاّ أف ئغف نـ أژرو، يگو أم وكريم نـ ژيط، مقّوريت ئمول يوعر، ديس ئمي سـ لغرب، د لغابت تبعد غف ـسن، ديس تمزگيدا مقّوريت، د أمن نّسن د ألاّغ نـ أژرو، وعرن ئمول، د غرقن دي تانوت ؤدجوت.

ئغاسرا يوه ؤفس د ؤدجون، طّفن ؤدجون د ؤدجون أتن تژرد سي ؤدجون، سـ ئسن يودان نّسن دي رّبيع، تفّغن ديد نـ تيلغمين د تاتّن، دي نودو تاسون ـد ئن ئغاسرا نّسن.