قصور وطرقات جبل نفوسة

يقّيم ـد(1) سـ ئسن غاسرو مّالون ـاس أت تاردايت، يمژون أف سن نـ ئغاسرا، أگار اسن أخريب نـ يودان ئمزوارن، أمشكان ديس يگو ؤير نـ تيدّار، يلاّ د ألمّاس نـ زّملت د أمقران، يلاّ أف ئغف نـ تحفافت، ديس سّات ـس تمزگيدا مّالون ـاس أمّي يحيا أتاردايتي، د يودان نّس زگني ئمازيغن، دد زگني ئبياتن، أمن نّسن د ألمّاس نـ لغابت تانوت، [د] غر ـسن ئساغّن ئمول، د تيطّ نـ أمن دي بوط نـ تحفافت.

سـ أدّو بريد أمقران تالين سـ ئس رّوجبان، د يودان تايط سي جّفارت، غر ـسن أزمّور يرخا، د تيغيوين نّسن ئمول، (ص17) تمورا نـ مندي كرّزن دي لدمنت يرخا، دد نيت تبعد أف غاسرو ييدي.

تاگوريا نـ سّاعت غوربي ـاس غاسرو نـ أشفي، يكان نـ ئمازيغن د تيرو نـ ئبياتن، ديس تمزگيدا مّالون ـاس أمّي طاهر، باب نـ تنمّيرت دد نيت د ألمّاس نـ لغابت، ينّط سـ ئس أزمّور، سّاوون سي تانوت دد غر ـسن ئساغّن ئمول.

لفصل دي تمورت نـ فسّاطو

غربي ـاس غاسرو نـ ئطرميسن، يلاّ أف ئغف نـ أژرو، دي ئمي سـ لقبلت ديس تمزگيدا تاحواريت، دد نيت تمزوارت نـ فسّاطو، ئباضيا، ئمازيغن، د ديس يگو زگني نـ تميضي نـ تيدّار، سّاوون سي تانوت، د ئساغّن.

سـ أدّو ـاس أمكان نـ أمن مقّر ئمول، مّالون ـاس تفيري، يلاّ دي جّفارت، دد نيت تينا طّفنت ؤدجون د ؤدجون أد گونت ؤكّوژ نـ ئغالّن، أل مّي أتـ سهويد ؤگا أتـ سلد أدوي نـ أمن، ژّاضون أم تاسيرت، أتن تژرد ؤگورن سّات غاسرو، دمنت نّسن نتنين د فسّاطو زّملت مقّريت ئمول، أگار ـاس د فسّاطو تگوريا نـ سنت نـ سّاعت.

سـ أدّو ـاس سـ لغرب ؤسف مقّور، سـ ئس أنـ كم فسّاطو، نيت ئباضيا، كرّزن ئمول، غر ـسن (ص18) أزمّور د تاتّن د تغاطّين ئمول د تيلغمين يدروس.