قصور وطرقات جبل نفوسة

دد شكشوك غاسرو نـ شوگران د لبدرانا، يسطشو أف تيطّ نـ أمن، ديس تزداي ئمول، تگّون ديس ئغماين، دد نيت تمورت نـ لوخم، ئباب نّس ئنحيفن. د أت ئگناون، ديس لمقام نـ أبي عوبيدا، دنّگ غاسرو يطّف، ديس لمقام نـ أمّي يحيا، سـ أدّو ـاس يبعد غف ـس أشّار غاسرو يوه، ديس تميضي د زگني نـ تيدّار، صّنعت نّسن تسار ئموقرانن، د ئمشكانن.

سـ يوس ألي د بريد نـ جّفارت، أتـ اس ـد ئن غاسرو نـ جادو، (ص20) يلاّ د ئغف نـ درار، سّات ـس تلات نـ أزمّور، سـ أدّو ـاس أژرو، د ألمّاس نّس شارت نـ تمزگيديوين، د سـ أدّو ـاس ؤدجوت مّالون ـاس تمزگيدا نـ لخوخت، د تيدي أمّي بيدت أگناوني.

د تمزگيدا نـ غاسرو أتـ ئگ ؤفس نـ تميضيوين نـ تيدّار، تسّاوون يودان نّس سي تانوت نـ ملتت، تحلاو، د لحيوان سّاوون سي تانوت د ألمّاس نـ درار، أگار أت ئگناون دد جادو. غر ـسن أزمّور يرخا، د تاتّن رخان[ـت]، غاسرو نـ جادو، نيت أمقران دي فسّاطو، ديس لمودير، د لعلم ديس أقديم، أمكان نـ لكتوب رخان، د تنميرت موقّريت، يزدغ ديس لحاج عبدالله بن يحيا

أباروني، أمقران نـ ئعزّابن دي درار، تّنط غف ـس لحلقت نـ ئروان.

سّات جادو غاسرو نـ مزّو مقّور ئمول، يلاّ دي بوط نـ تلات، دي ئغف نـ أژرو، د ديس شارت نـ تمزگيديوين، د ألمّاس نـ غاسرو، دد سنت دي لمدينت، ؤدجوت مّالون ـاس أمّي نوح، د تيدي مّالون ـاس أمّي يونس، دد غاسرو وو أ ييگ ؤفس نـ تميضيوين نـ تيدار.

سّاوون سي تيط نـ مزّو، تلاّ سـ أدّو غاسرو، ديس تزداي ئمول، تهوگا (ص21) ئن ؤسف نـ زّرگا، غر ـسن أزمّور يرخا، د لحيوان يرخا، كرّزن نيتن دي طّاهر ئمول، د جّفارت يدروس، دد ييدي كرّزن د جّفارت ئمول، د طّاهر أشّار، د غرب سي مزّو أتـ هويد ئن ؤسف نـ زّرگا، يدغرق ئمول، يطشار سـ تزداي ديس تالا نـ أمن مقّريت، تسيوط ئن شكشوك دي تگرست.