قصور وطرقات جبل نفوسة

سـ ئس أتـ اليد ئن جمّاري، يمژون أف سن نـ ئغاسرا، أگار اسن تمزگيدا مّالون ـاس نانّا مارن، تلاّ دي سّيرا نـ أحمد أشمّاخي، تسطشو أف ئغف نـ أژرو مقّور ئمول.

غربي ـاس أزمّور يرخا، دي زّملت مقّريت، غر ـسن ئساغّن أشّار، د سّاوون سي تالا نـ زّرگا.

تبعد غف ـسن ئمول ديس سن نـ تميضيوين د زگني نـ تيدّار، غر ـسن تمداي رخانت د لحيوان يرخا.

بحري نـ جمّاري تيقسبت نـ أت ئندباس، تلاّ أف ئغف نـ أژرو، ديس تمزگيدا مشّكيت، د ئباب نّس تگّون تسارا، سّاوون سي تانوت تلاّ د بوط نـ تحفافت، تبعد أف تيقسبت غربي ـاس زّملت تمقرانت، ديس أخريب مقّور، د ألمّاس نـ أخريب تمزگيدا.

سّات أخريب تلات نـ ؤم طّبول، (ص22) ديس أزمّور يرخا، أد گون ؤير نـ تيدّار، مّالونت تيمازيغين: ووه ـ "ؤل غر ـسن تزمّورت دي ؤم طّبول، ؤل غر ـسن غير لهول".

سـ ئس بحرا أتـ اس ـد ئن تيمزغورا، دد نيت تمژون أف سنت نـ تيقسبين، تلاّ د ألمّاس نـ أخريب د ألمّاس نـ زّملت، ديس تمزگيدا مّالون ـاس أبو منصور ئلياس، نيت سي ئمقرانن نـ ئنفوسن ئمزوارن، سي كانون أت روستوم د ئجلّيدن دي تيهرت، د ألمّاس نّس أسغ نـ أمن سّاوون يودان نـ تيقسبين أمن نـ أنژر. غر ـسن ئساغّن ئمول، د تينا بعدنت غف ـسن، لاّنت دي تلات نـ ويفات قبلي ـاس زّملت تمقرانت أد گون تميضي نـ تيدّار، أگار ـاس د تقسبين تقبليين تگوريا نـ سّاعت.

سـ ئس أد ناس ئن ويفات، دد نيت قبلي نـ تيمزغورا، تلاّ أف ئغف نـ تحفافت، سـ شرق نّس زّملت، ديس أزمّور يرخا، مّالون: "أل مّي أ يوقا طمژين سي ديسير، د دي سي ويفات، مل دّونيت تفات". ديس تمزگيدا مقّريت، سـ أدّو ـاس ؤسف نـ تمزداي، سـ دنّگ ـاس أخريب نـ ويفات، أد گون تميضي د ؤير نـ تيدّار.