قصور وطرقات جبل نفوسة

سّات ـس تيقسبت نـ رگرگ، تلاّ أف (ص23) ئغف نـ أژرو، د ألاّغ نـ تلات ديس تمزگيدا مشّكيت، سـ أدّو ـاس سـ لغرب ؤسف، ديس تانوت نـ أمن، سّاوون سـ ئس أت رگرگ، د تمزدا دد نيت طّفنت ؤدجوت د ؤدجوت، أگار اسنت لحلف نـ أژرو، أ تيگ رگرگ زگني نـ تميضي نـ تيدّار، شرقي ـاس د قبلي ـاس أزمّور يرخا.

غربي ـاس غاسرو نـ تمزدا، أف ئغف نـ تحفافت، سّات ـس تلات نـ أزمّور بحري ـاس، د غربي ـاس زّملت، ديس سنت نـ تمزگيديوين، ؤدجوت مّالون ـاس تحواريت، د تيدي تلا دفّر غاسرو.

د ألمّاس نـ غاسرو سن نـ ئفاسّن نـ تيدّار نـ ئبياتن مّالون اسن شّويّاب، د يودان نّس كرّزن ئمول غر ـسن أزمّور د تاتّن يرخا، دد غاسرو يوه يتگ سنت نـ تميضيوين نـ تيدّار.

ديس سّات ـس دي لغابت سنت نـ تمزگيديوين، ؤدجوت مّالون ـاس تحواريت تمقرانت، نـ يودان ئمزوارن، تسطشو سـ لجير، د أدغاغ، تلاّ د ألمّاس نـ لغابت، ئمودّان(1) نّس ديسن تيرا ؤل يت يسّن ؤدجون سينغ ماي ديس، مّالون ئروان توه نـ يودان لجوهّال، سّات سيدنا موحمد، د تمزگيدا تيدي مّالون ـاس أبو زكريا (ص24) تّوكيتي، توسد دي أيدر نـ تلات نـ أزمّور تغزو تغازا، سـ أدّو تمورت تلاّ سـ لغرب نـ تحواريت.

لفصل دي تمورت نـ رّحيبات

سـ يوس أتـ اس ـد ئن غاسرو نـ ئنر، زگني نّس ئبياتن دد زگني ئمازيغن، يلاّ د ألمّاس نـ زّملت غربي نـ تمزدا، ديس تمزگيدا، ينّط سـ ئس أزمّور، أ ييگ زگني نـ تميضي نـ تيدّار، ئباضيا، سّاوون سي تانوت تلاّ قبلي نـ غاسرو، تبعد ئمول دي بوط نـ تحفافت، د ألمّاس نـ ؤسف.