قصور وطرقات جبل نفوسة

سـ ئس أتـ اس ـد ئن ئجيطال، غاسرو نـ شّيخ سماعيل ؤ موسى، باب نـ تّواليف ئمقرارن، دي بريد نـ ئباضيا، يلول دي درار، دي غاسرو يوه، دد يمّت د ينطل دي تمزگيدا تمقرانت دي جربا، ديس تمزگيدا مّالون ـاس أجيطال، د ألمّاس نـ أخريب، يقرب ئن غاسرو، سـ شّرق، شرقي نـ تمزگيدا تلات د﴿ه﴾د نيت د ألمّاس نـ لغابت، سّاوون أمن نـ أنژر، غر ـسن ئساغّن ئمول، يمژون أف سن ئغاسرا، أد د اسون زگني نّس ئباضيا د زگني ئبيّاتن د غاسرو شرقي د أغربي ئبياتن وحداسن.

يلاّ دي ئغف نـ درار، (ص25) ينّط سـ ئس تيلاتن نـ أزمّور سي كل مكان، غر ـسن تانوت تبعد ئمول، أ تيگ تميضي د زگني نـ تيدّار.

سّات ـس أخريب، أگار ـاس د أجيطال تگوريا نـ زگني نـ سّاعت، د أخريب ووه مّالون ـاس، أخريب نـ رّحيبات، د أخريب نـ ماسين، يلاّ د ألمّاس نـ لغابت ديس ئمالكيين، سن نـ ئفاسّن نـ تيدار ئمازيغن، ديس تمزگيدا مقّريت ئمول، مّالون ـاس تمزگيدا نـ ماسين، غر ـسن أزمّور يرخا، أخريب ديس أ ييگ سنت نـ تميضيوين نـ تيدار.

سـ ئس سـ لغرب غاسرو نـ لحومران، ديس تمزگيدا مّالون ـاس تمزگيدا نـ ئمرساون، تلاّ سّات غاسرو أف ئغف نـ أژرو، لحومران زگني نّسن ئمازيغن دد زگني نّسن ئبياتن، تسطشو أف ئغف نـ أژرو، سّاوون سي ئساغّن، دد غر ـسن تانوت دي بوط نـ تحفافت، سـ مبحّر د ألمّاس نـ ؤسف نـ تزداي ئدغرق ئمول، دد نيتن أد گون تميضي نـ تيدار، أزمّور نّسن يبعد غف ـسن سي شرق د لقبلت.

غوربي اسن سنت نـ تيقسبين، طّفنت ؤدجوت د ؤدجوت، تقبليت مّالون ـاس أت لمتيوين، ديس تمزگيدا مشّكيت، يسطشو ـت أمّي حمد ؤ لحاج أباروني، سي أروان نـ درار، (ص26) تلاّ د ألماس نـ تيقسبت دد نيت توس ـد أف ئغف نـ أژرو، د ألماس نّس تيدار نـ يودان نّس، دد نيتن ئمازيغن، ديس أ ييگ ؤير نـ تيدار.