قصور وطرقات جبل نفوسة

تيقسبت تابحريت مّالون ـاس أت بوجديد ئمازيغن، تلاّ د ألماس نـ أژرو، سـ أدّو ـاس سـ لغرب ؤسف ئدغرق ئمول، ديس تزداي، تلاّ ديس تيطّ نـ أمن، سّاوون سـ ئس، دد نيت أ تيگ ؤير د سن نـ ئفاسّن نـ تيدار.

سـ يوس أد ناس ئن تيقسبت نـ لخطوع، تلاّ غربي نـ لحومران، أگار ـاس د لحومران لخلق مشّك، د لخطوع، يوس ـد دي ئغف نـ درار، ينّط سـ ئس أزمّور، يودان نّس ئمالكيين، ديس سنت نـ تيدار ئمازيغن، أ ييگ سن نـ ئفاسّن نـ تيدار، سّاوون نيتن د تيقسبين تيمزوارين سي تيط ؤدجوت.

سـ يوس غرب د بريد أتـ اس ـد ئن لمشهد نـ لمشايخ، ييه نغون تن دد نيتن تژالّون د ألماس نـ ؤسف، دنّگ تحفافت، غرديسن تمزگيدا تلاّ دوس [أ]ن تيرو، تصمّيت، ﴿ت﴾ قّيمون ئدمّن نّسن ئن تيرو زوگّغنت، دهك غف ـسن تكوفّت نّك، سـ أشّار نـ تكوفاس، أتـ اف ـد ئدمّن دي تكوفت، سستن غف ـسن (ص27) أك سيوطن ئن غر ـسن، أگار ـاس د لخطوع تگوريا نـ زگني نـ سّاعت.

سـ يوس أهوا د ؤسف مبحر، أتـ اس ـد ئن ؤنزيرف، تلاّ أف تحفافت سـ لغرب، دد نيت ئمازيغن، د ئبياتن، ديس تمزگيدا، ئباضيا، قبلي ـاس أزمّور يرخا، دي زّملت مقريت ئمول، أد گون تميضي نـ تيدار، سّات أت بوجديد، أگار اسنت لخوشّت.

سـ ئس غرب أتـ اس ـد ئن غاسرو نـ لگنافيد، دد نيت ئمالكيين، يلاّ د ألماس نـ لخلق، ينّط سـ ئس د الماس نـ لغابت نـ أزمّور، غر ـسن ئساغّن د تانوت، سـ أدّو ـاس غاسرو، دد غر ـسن تمداي رخانت، أد گون تميضي نـ تيدار، أگار اسن د ؤنزريف تگوريا نـ شارت نـ سّاعات.

سـ أدّو ـاس سـ مبحر لخوشّت مقّريت ئمول، ديس تيقسبت نـ شّوايب، مشّكيت، أ تيگ شارت نـ ئفاسّن نـ تيدار، تلاّ د ألماس نـ تحفافت.