قصور وطرقات جبل نفوسة

دنّگ ـاس سـ لغرب زّملت مقّريت، ديس دوس تيقسبت نـ يودان ئمزوارن، قبلي أخريب نـ سّلامات، مقّر ئمول، ديس تمزگيدا مقّريت، سـ أدّو تمزگيدا أندور نـ يودان ئمزوارن، نـ باب نـ أخريب، ديس ؤفس دد سن نـ لمقامات نـ دي، مّالون ـاس (ص28) تانفوست غف ـسن:

ييسّي ؤدجون أمكراز دي شروس يتبّي ئردن رخان، سي يشيشال د يجرو يردن نّس أتن ييگ د گودا، تقّيمون دوس نودو بكمال يتسكن ئن يودان أيتني نّس ئهيالا ؤل ـاش مامّو أم نيت، ژارون ديس يودان نـ [و]خريب ؤه نـ سلامات، دد نيتن أگار اسن، تاگوريا نـ زگني نـ أسّ.

تيكّلت، يوسد باب نـ گودا نـ ئردن نـ باب نـ [و]ندور أمقران، ينسو غر ـس.

يملو باب نـ أندور ئن ئشمجان نّس: "قّنت أف ئلغمان دي تيكّلت ؤدجوت أتـ تطشورم تشوماي دي تيكّلت، أتـ سهويم غف سنت دي تيكلت ؤفس دد سن نـ لمقامات." أن تاسكّيرت، ئگون ئشمجان سيه، د أرگاز يطّس.

أندور ؤه، سي عصرن دي تيكّلت، يهوا دي يقوّا تاطونت ؤدجوت، يهوا د ألماس نـ تيجنت نـ دي، يقّيم ئژاض أم ؤسف.

يملو أرگاز ئـ باب نـ [و]ندور: "ماي ؤسف ؤه يژاض ساه؟"

يملو: "طّس، ؤلا مسالا. كان ئشمجان عصرن أندور".

يكّر سـ يوس أرگاز ئه، يگور ئن غر ـسن، يمل اسن ئن يودان نّس: "ؤل غرنغ نتشن مسالا". سا سيه، ؤل يدجو ئردن نّس ئن (ص29) برّا .

توقا تنفوست نـ ئمزوارن.

[أ]نـ دول تيرو ئن أخريب نـ سّلاما مقّر ئمول، تمورت نـ تيرزا ينّط سـ ئس أزمّور، بحري ـاس غاسرو نـ سّلاما، دد نيت ئبياتن، غر ـسن تيقسبت، سّات غاسرو أگار اسن لخلق مشكيت، دد غاسرو يلاّ اف ئغف نـ تحفافت، سـ أدّو ـاس تيط نـ أمن سّاوون سـ ئس، ديس أشّار نـ تزداي، غر ـسن تمطشين ئمول، د أزمّور يدروس، أگار ـاس د لگنافيد تگوريا نـ سّاعت.