قصور وطرقات جبل نفوسة

غربي نـ سّلاما غاسرو نـ گطروس، يلاّ د ألمّاس نـ زّملت، زگني نّس ئمازيغن، دد زگني ئبياتن، مّالون اسن لفياصلا، لاّن أف ئغف نـ تلات، غر ـسن تمزگيدا، سّاوون سي تانوت تلاّ سّات ـسن، د سّات ـسن أشّار نـ تيدّار وحد اسنت، دد نيت(1) أد گون تميضي نـ تيدّار، غر ـسن ؤسف مقّر ئمول مّالون ـاس جّيوش، ديس تزداي رخانت، د ديس سنت نـ تقسبين تمقرانت، د تمشكانت، يودان نّس ؤطنن سـ لوخم.

دي ئغف نـ ؤسف تمزگيدا مّالون ـاس نانّا تالا دي تشقّي نـ أژرو، دي بوط نـ أژرو، تلاّ تكمو (ص30) سـ [أ]دواس، مقّريت، تطشار سـ أمن، سّاوون سـ ئس يودان، د لحيوان، أمن نّس حلاون ئمول، قبلي نـ تمزگيدا سـ لغرب دي أژرو تقديت نـ ئطارّن نـ تغاطين نـ نانّا تالا، كمون ئطارّن نّسنت د ألمّاس نـ أژرو، لاّنت تقيمونت أن تيرو.

ينّط سـ ئس أژرو سي كول أمكان، دد نيت قبلي نـ گطيس، أگار اسن تگوريا نـ شارت نـ سّاعات، د ألاّغ نـ برّ سوف أخريب مقّر ئمول مّالون ـاس شروس، ديس تمزگيدا نـ أبو معروف، باب نـ تنميرت مقّريت دوس توقا لموديريت نـ فسّاطو.

لباب دي لموديريت نـ لالوت

لفصل دي تمورت نـ لحرابا

أنـ ادل تيرو سـ شرق، سي تمورت نـ لحرابا سي لخشت، ديس غاسرو يلاّ د وكريم نـ درار، ينّط سـ ئس أزمّور، دد نيت درار يولي مصعد ئمول، يلاّ وحدس د ألماس نـ لخوشّت، مّالون ـاس ئغف نـ زعرارا، غاسرو مشّك، ديس أ ييگ ؤكژ نـ ئفاسّن نـ تيدّار، ينّط سي درار تمطشين رخانت، تزداي أشّار، يودان نّس ئمالكيين (31) ملون فـ درار ووه ديس ؤقدو نـ لفجرت.

سـ أدّو تمورت غربي ـاس تيقسبت مشّكيت مّالون ـاس دگّي، تلاّ دي الاّغ نـ درار لخوشّت تطّف د أخريب يلاّ دوس، دد نيت ئمالكيين أد گون سن نـ ئفاسّن نـ تيدّار.