قصور وطرقات جبل نفوسة

دنّگ لخوشّت دي ئغف نـ درار د ألمّاس نـ زّملت أخريب مقّر ئمول ديس تمزگيدا، د أندور نـ أزمّور، ئن تيرو يژاض، سّات أخريب ؤسف نـ تزداي د [ؤ]زّمور ئدغرق، ديس أمن ئمول، دد نيت سـ [أ]دّو غاسرو نـ جريجن.

سـ مبحر دنّگ ـاس سـ لقبلت جريجن، تلاّ أف وكريم نـ درار، ديس تمزگيدا دد نيت ئباضيا سّات ـس تلات، غربي ـاس أزمّور، ديس أ ييگ تميضي نـ تيدّار، يودان نّس تفغن ئمول ئن جربا، نزّغن ديس ئگرميلن.

قبلي ـاس يرخا غاسرو مّالون ـاس بگّالا، ديس زگني ئمازيغن، دد زگني ئبياتن، غر ـسن تينا ئمول، نزغن تگّون ئغماين يرخا، د ئباب نـ أزمّور، د لحيوان، ديس تمزگيدا دد نيت أ تيگ تميضي دد سن نـ ئفاسّن نـ تيدّار، لاّن د ألمّاس نـ لغابت دي ئغف نـ تلات.

غربي ـاس غاسرو نـ بگيگيلا، يلاّ د ألماس نـ لغابت د يودان نّس ئمالكيين أشار، (32) سـ ئسن ئمازيغن ديس تمزگيدا.

بحري نـ جريجن غاسرو مّالون ـاس تينزغت، يلاّ أف ئغف نـ تحفافت، شرقي ـاس تلات، زگني نّس ئمازيغن، دد زگني ئبياتن، ديس تمزگيدا، ديس تدّارت نـ لمودير يتقيم ديس أل مّي أد ياس ئن لحرابا، قبلي ـاس أزمّور أ تيگ زگني نـ تميضي دد سن نـ ئفاسّن نـ تيدّار، تبعد أف جريجن.

غربي ـاس تيقسبت مّالون ـاس ؤم صوفّار، زگني ئمازيغن، دد زگني ئبياتن، تلاّ د ألمّاس نـ درار أ تيگ سن نـ ئفاسّن نـ تيدّار.

غرب أتـ اس ـد ئن غاسرو نـ مرگس، يلاّ د ألمّاس نـ ؤسف دد نيت ئمالكيين، غربي ـاس تدزيرت مّالون ـاس أزازيرا، أژرو يمونقت سي كول أمكان، ديس ئمي ؤدجون، يوعر ئمول، دي ئغف نّس أمكان نـ ئبرگان نـ يودان ئمزوارن، كانون سكرمن ديس ئمان نّسن، رولن سي لعادو، ديس أسغ د ألمّاس نّس ئن تيرو، يلاّ سـ أدّو تادزيرت ؤسف مقّور ئمول، د لخوشّت موقّريت ئمول.