قصور وطرقات جبل نفوسة

غربي ـاس دي ئغف نـ تحفافت غاسرو نـ تندميرا، غربي ـاس زّملت مقريت تطشار سـ أزّمور، يودان نـ غاسرو و﴿ي﴾وه غر ـسن تزداي رخانت، (ص33) سّاوون سي تانوت، تلاّ سّات ـسن، د ألمّاس نـ تلات. نيتن ئمازيغن، ديس تمزگيدا، تغزو تغازا، سـ [أ]دّو تمورت، تطّف دي غاسرو سـ مبحر، دد نيتن أد گون زگني نـ تميضي نـ تيدّار.

يطّف ديس أخريب سـ لغرب، ديس تمزگيدا ؤدجوت، مشّكيت، د تيدي تمزگيدا نـ أبو نصر باب نـ لبيات ئمول، سـ ئسنت "النونية" دي بريد نّغ.

غربي نـ أخريب أمقران أخريب أمشكان، ديس غاسرو نـ يودان ئمزوارن، د ألمّاس نّس تيقسبت، ئباب نّس ئباب نـ أخريب، كانون فّغن سـ ئس د تيرو دولن اسد، لاّن ديس، أد گون شارت نـ ئفاسّن نـ تيدّار.

تلاّ د ألمّاس نـ درار، سّات ـس لغابت نـ أزمّور، سـ دفّر ـاس لحلق مقّر يهوا مغرّب، بحري نـ لحلق، تطشار سـ أزمّور د تمطشين، سـ [أ]دّو ـسن ؤسف مقّر ئمول، أگار ـاس د تي نـ طمژين، ديس تزداي يرخا، تيني نّس تگنانيت، ول ـاش أم نيت دي درار، ديس أشّار نـ تمطشين.

دنّگ ـاس سـ لغرب دي ئغف نـ تحفافت غاسرو مقّر مّالون ـاس تي نـ طمژين، ديس لغابت مقريت نـ أزمّور، د تمزگيدا تلاّ دي ئغف نـ درار سّات (ص34) غاسرو سـ لقبلت، غر ـسن ئساغّن ئمول، سّاوون سـ ئسن، أل مّي أد ؤقان سّاوون سي تانوت تلاّ دي لخوشّت.

سـ مبحّر نـ غاسرو دي ؤسف أمقران، سـ أدّو غاسرو ئهوگا ئن جّفارت، ينغّل دي تيجي، أخريب أمقران نـ ئنفوسن ئمزوارن، د تيرو قيمونت كان تينا ديس رخانت، د أمن نّسنت يرخا، د تگزلالين أف ؤدم نـ تامورت، سّنن تنت يودان لكولّ، ئمازيغن، د ئبياتن، هوگان غف ـس ئبياتن دي نودو.