قصور وطرقات جبل نفوسة

دنّگ ـاس مصعد دي ئغف نـ أژرو زّملت نـ أزمّور مقّريت، ديس أخريب مقّور مّالون ـاس أخريب نـ فرسطّا، د ألمّاس نّس تمزگيدا نـ فرسطّا، سّات زّملت سـ لقبلت غاسرو نـ فرسطّا، يلاّ د ألمّاس نـ درار، ديس تمزگيدا نـ أمّي يحيا فرسطّايي، أگار ـاس د تي نـ تمژين ؤسف مقّور، ديس تزداي رخانت، د ديس تلات تنغّل ديس، تولي مغرّب، ديس تيط نـ أمن سّاون سـ يس أت فرسطّا، دد غر ـسن تانوت سّات ـسن، دد نيت ئمازيغن، ئباضيا، غرسن غاسرو تيگون ديس ئردن، د تمژين، د دينلّي، د تودفت، د ماي غر ـسن يلاّ ديس غف ـس نيلتي.

سـ يوس غرّب أتـ اس ـد ئن كاباو، نيت ئباضيا، د أمقران (35) أف ئغاسرا يايط نـ لحرابا، د يودان نّس ئروان، عزمن يرخا، سـ ئسن تيگون تموسني دي لموديريت، [أ] ييگ ؤفس نـ تميضيوين نـ تيدّار، يلاّ أف ئغف نـ درار، نّطنت سـ ئس تيلاتن نـ أزمّور، د تزداي، سّات ـس تمزگيدا مّالون ـاس قشقاشا، تغزو تغازا، د ألمّاس نّس أسغ نـ أمن نـ أنژر مقّور ئمول، تطّف ديس تمزگيدا تاترارت سـ لغرب، نيت نـ أمّي سعيد نـ أيوب، دنّگ تامزگيدا تاجبّانت.

غاسرو يوه، لخشايش نّس طشارونت سـ تمداي، ؤل ـاش دي درار مامّو غر ـسن تمداي أم نيتن، د يودان نّس قوّان ئمول، غر ـسن تاتّن رخانت، د أزمّور يرخا.

غربي ـاس ؤسف مقّور ئمول، مّالون ـاس ؤسف نـ شّيخ، دي ئغف نّس سـ لغرب، زملت موقّريت. د أت كاباو مّالون اسن ئنفوسن ئفردين، لاّن ديس يودان رخان غر ـسن تيطّ ؤدجوت، د ئرگازن نّسن ؤجار نـ تسدنان، تقيمون أن أد وسّرن ؤل نجّفن.

لفصل دي تامورت نـ لحوامد