قصور وطرقات جبل نفوسة

أنـ ادل تيرو سي أخريب ؤل ديس ـش يودان، د تيرو يطشار(ص36) سـ ئبياتن ئمالكيين، دد نيت د ألمّاس نـ لغابت ينّط سـ ئس أزمّور د تمطشين، سّاوون سي تانوت تلاّ غربي اسن دي تلات تبعد أف أخريب، دد غر ـسن ئساغّن دي أخريب، غربي ـاس غاسرو نـ تيركت، ئمالكيين مشّك يلاّ أف ئغف نـ درار، سـ [أ]دواس تلات غربي ـاس غاسرو نـ لخربت، دد نيت ئمالكيين، ديس سنت نـ تيدّار ئمازيغن، ئباضيا.

يلاّ دي ئغف نـ أژرو قبلي ـاس، لحلق، ديس تيط نـ أمن سّاوون سـ ئس، د لغابت نّسن تلاّ سـ ﴿ن﴾ مبحّر دي زّملت، أزمّور د تمطشين ول غر ـسن ـش تزداي.

بحري نـ لخربت [نـ] لمجابرا، دد نيت تلاّ أف ئغف نـ تحفافت، يودان نّس ئمالكيين.

سـ يوس غرب أتـ اسد ئن غاسرو نـ أت محمود، مّالون ـاس ئمزوارن ويغو، يودان نّس زگني ئمازيغن، دد زگني ئبياتن، يلاّ د ئغف نـ درار، ينّط سـ ئس تيلاتن سي كول أمكان، غر ـسن تانوت سـ شرق، د ألمّاس نـ تلات نـ أزمّور، دد غر ـسن تيطّ سـ [أ]دّو غاسرو سـ لغرب، د ديس تمزگيدا مقّريت أد گون تميضي د زگني نـ تيدّار.

سـ ئس أهوا ئن ألاّغ نـ أژرو ديد نـ لحلق، أتـ اس ـد ئن ؤسف (ص37) يلاّ أگار ـاس دد لالوت، ﴿ئمول﴾، يزگرت يرخا، ديس تزداي، د تمطشين رخانت، سـ ئس أتـ اليد مغرّب، أتـ اس ـد ئن غاسرو أمقران نـ لالوت، يلاّ أف ئغف نـ أژرو، سـ لغرب، سـ [أ]دواس د ألاّغ نـ أژرو.

سـ شرق تيطّاوين نـ أمن رخانت، د تانوت تسسون سـ ئس تاتّن، د تيدي أد گون ديسنت ئغماين، د ؤدجوت مّالون ـاس تاغليس، تطشارون سـ ئس يودان نـ غاسرو، دد غر ـسن تانوت تلاّ سّات غاسرو، د ألمّاس نـ لحلق، سّاوون سـ ئس تّورك، د ألمّاس نّس تاحنوت نـ زنزي د تمسغيوت، ديس تاسيرت نـ ژاضي، د فيرنو نـ [و]غروم، يزدغ دوس لمودير د تّورك، ديس ئمرودن مقّورت(1).