قصور وطرقات جبل نفوسة

دي ئغف نـ ودرار سـ لغرب نـ غاسرو، [دي] زملت مقّريت ئمول، د أزمّور نّس يبعد تگوريا نـ زگني نـ أسّ، سـ لغرب، د[ي] لقبلت غر ـسن تينا، مّالون اسنت لحسيان، ديسنت أد گون ئغماين، دد ژاليم، د تيشّرت، د فلفل، ديس تزداي، غاسرو نـ لالوت أ ييگ شارت نـ ئفاسّن د ؤدجون نـ تميضيوين نـ تيدّار ئمازيغن، ئباضيا، أگار ـاس (ص38) د لحوامد تگوريا نـ زگني نـ أسّ، غاسرو يوه ديس غاسرو وايط مشّك د ألمّاس نّس، ديس أ ييگ ؤير نـ تميضيوين نـ تميدال، تسكرمن ديس ئقبّاش نّسن، غف ـسن نيلتي ؤدجون، سـ تمديت ئن تمديت، أد اسون ئباب نـ تميدال سـ تنيسا نّسن، تاكمون، تارون تميدال، تاوين تنوبت نـ تادّارت دد منسي نـ تغالّين، د ماي يلاّ نـ تزنزي تيگون غف ـس أدلاّل دي تمديت ئه أتـ زنزون.

سـ أدّو غاسرو يوه ﴿أمشكان﴾ سـ مبحّر تمزگيدا تمينجت، تژالّون ديس يودان ئمينجن، مّالون ـاس تمزگيدا تمقرانت، سـ أدو اسن أغلض نـ ئعزابن، سّات ـس تمزگيدا تاترارت. د أت لالوت ييه نّطن أف تمزگيدا نـ سيدي خليفا، ديس أشّار سطشون ـت د تسطشي، د يودان نّس ؤگّاتون زرزر، د تيرژژت، تاويند ئسان يرخا د درار نـ ئنفوسن، ول ديس ـش غاسرو مقّر أم لالوت.

سـ يوس غربي ئن وازّن، أگار ـاس دد لالوت تاگوريا نـ أسّ، يلاّ أف ئغف نـ تحفافت، ديس تمزگيدا مقّريت، يودان نّس ئمازيغن، سـ أدّو ـاس سـ لغرب ؤسف مقّر، غر ـسن تمطشين رخانت دي ؤسف، (ص39) دد نيتن أد گون سنت نـ تميضيوين دد زگني نـ تيدّار، سّاوون سي لخشّت، سي تينا، د لغابت نّس سـ لقبلت، تبعد د نيت تنگّاروت نـ درار نـ ئنفوسن سـ لغرب.

لفصل دي لوولات نـ درار نـ ئنفوسن

د سـ ماني تاسون ـد

ييه نـ ئفران، لباشا د لقاضي د لموحاسب تاسون ـد سي ستامبول د لكاتب د سندوقامين ئباب نـ ئفران، د لعضاوت سـ ئسن.